Wednesday 30 June 2010

ပီတိမျက်ရည်

လူတွေကဝမ်းနည်းတဲ့အခါမျက်ရည်ကျတတ်သလို၊ဝမ်းသာတဲ့အခါလည်းမျက်ရည်ကျတတ်ကြပါတယ်။ဝမ်းနည်းခြင်း၊ဝမ်းသာခြင်းဆိုတာလည်းခံစားမှုတစ်ခုပါ။ဝမ်းနည်းမှုဆိုတာလည်းခံစားတဲ့လူအပေါ်မူတည်ပြီးအမျိုးမျိုးရှိသလို၊ဝမ်းသာစရာအကြောင်းလေးတွေကလည်းခံစားတဲ့လူအပေါ်မူတည်ပြီးကွဲပြားကြပါတယ်။အများစုကတော့မိမိပတ်ဝန်းကျင်၊မိဘဆွေမျိုးတွေကြောင့်ဘဲဝမ်းသာမှု၊ကြည်နူးမှု၊ဝမ်းနည်းမှုတွေဖြစ်ပေါ်ခံစားကြရတာပါ။
မိဘဆွေမျိုးတွေနဲ့ဝေးနေတဲ့အခါ၊တစ်ယောက်တည်းအထီးကျန်ဆန်နေတဲ့အခါ၊တစ်ခြားတိုင်းပြည်မှာရောက်ရှိနေတဲ့အခါဝမ်းနည်းမှုကပိုပြီးဖြစ်လွယ်သလို၊စိတ်အားငယ်မှုတွေဖြစ်တတ်ပါတယ်။အထူးသဖြင့်တစ်ခြားတိုင်းပြည်ကိုရောက်နေပြီးနေမကောင်းထိုင်မသာဖြစ်တဲ့အခါဝမ်းနည်းအားငယ်မှုတွေပိုပြီးဖြစ်လာတတ်ပါတယ်။ဒီလိုအချိန်မှာအပေါင်းအသင်းသူငယ်ချင်းတွေရဲ့အားပေးမှုတွေ၊ဂရုစိုက်မှုတွေကြောင့်အားငယ်စိတ်တွေလျှော့လာတတ်ပါတယ်။
တစ်ခါကကျွန်မနေမကောင်းဖြစ်ခဲ့တုန်းကပေါ့။သူငယ်ချင်းတွေရဲ့အားပေးစကားတွေကြောင့်အားငယ်မှုတွေလျော့ခဲ့ရပါတယ်။ဒါပေမယ့်လည်းသူတို့တွေနဲ့ကတစ်နေရာဆီမှာအားတော့ငယ်မိပါတယ်။ကိုယ်နေတဲ့မြို့မှာကလည်းမြန်မာကမရှိပါဘူး။(ရှိတယ်လို့တော့ကြားမိပါတယ်။မတွေ့ဖူးပါဘူး။)အဲဒီလိုစိတ်ခံစားချက်တွေဖြစ်နေတဲ့အချိန်မှာကျွန်မနဲ့မေဂျာတူတဲ့ဂျပန်မသူငယ်ချင်းလေးကည(၉)နာရီလောက်မှာကျွန်မကိုဖုန်းဆက်ပြီးသူအဆောင်ရှေ့မှာရောက်နေတဲ့အကြောင်းပြောပါတယ်။နေကောင်း၊မကောင်းအခြေအနေလာကြည့်ပေးတာပါတဲ့။(နေ့လည်ကနေမကောင်းလို့အဆောင်ပြန်သွားတာသူကသိတယ်။သူကအခုမှကျောင်းကပြန်လာပြီးအိမ်ပြန်ရမှာပါ။ပြီးတော့သူကတစ်ခြားမြို့ကပါ။)အခက်အခဲရှိရင်သူကိုပြောဖို့၊အစစအရာရာဂရုစိုက်ပြီးနေထိုင်ဖို့ပြောပြတယ်။ပြီးတော့လည်းယူလာပေးတဲ့စားစရာတွေကဘယ်လိုပစ္စည်းတွေပါပြီးဘာအတွက်ကောင်းတယ်ဆိုတာကိုသေချာရှင်းပြပါတယ်။ဒီလိုညအချိန်ကြီးမှာလာပြီးအသေးစိတ်ဂရုတစိုက်ပြောပြတာရယ်၊ကိုယ်ဝမ်းနည်းအားငယ်နေတဲ့အချိန်မှာသူရောက်လာတာရယ်ကြောင့်အားငယ်မှုတွေအနည်းငယ်ပြေပျောက်လာပါတယ်။ဒါပေမယ့်ကျွန်မရဲ့မျက်ဝန်းကနေတော့မျက်ရည်တွေကျလာပါတယ်။ဒီမျက်ရည်တွေကတော့ဝမ်းနည်းလို့ကျလာတဲ့မျက်ရည်မဟုတ်ဘဲဝမ်းသာလို့ကျလာရတဲ့မျက်ရည်တွေပါ။ကိုယ့်ကိုဂရုတစိုက်နဲ့အားပေးဖော်သူငယ်ချင်းလေးရှိပါလားဆိုပြီး ပီတိဖြစ်ပြီးကျလာတဲ့ပီတိမျက်ရည်တွေပါ။ကျေးဇူးတင်ပါတယ်သူငယ်ချင်းလေးရယ်…..။

Monday 21 June 2010

စကားပြောသောနှုတ်ခမ်းလေးတစ်စုံ

ဆိုရိုးစကားလေးတစ်ခုကြားခဲ့ဖူးပါတယ်။နှုတ်ကြောင့်သေ၊လက်ကြောင့်ကြေတဲ့။ပြီးတော့ချစ်စေတာလည်းဒီနှုတ်ခမ်း၊မုန်းစေတာလည်းဒီနှုတ်ခမ်းလေးတွေပါဘဲ…။ဒီနှုတ်ခမ်းလေးတွေကြောင့်စိတ်ခံစားမှုအခြေအနေတွေအမျိုးမျိုးရရှိနိုင်ပါတယ်။နှုတ်ကနေထွက်ကျလာတဲ့စကားလေးတစ်ခွန်းကအင်မတန်မှ အရေးပါသလို၊အရေးလည်းကြီးပါတယ်။
ကိုယ့်ရဲ့နှုတ်ခမ်းကပြောတဲ့စကားလေးတွေကြောင့်သူတစ်ပါးပျော်ရွှင်ရသလို၊တစ်ခါတစ်ရံမှာတော့စိတ်အနှောင့်အယှက်ဖြစ်စေပါတယ်…။ခံစားမှုမျိုးစုံဖြစ်စေတာလည်းဒီနှုတ်ခမ်းလေးတွေပါဘဲ။ဒီနှုတ်ခမ်းလေးတွေကတစ်ခါတစ်ခါချစ်စရာကောင်းသလို၊တစ်ခါတစ်ခါကျတော့လည်း ချစ်စရာမကောင်းပြန်ဘူး…။ပြောလိုက်တဲ့စကားလေးကတော့ အတူတူပါဘဲ…ဒါပေမယ့်ခံစားချက်တွေမတူညီတဲ့အခါဒီစကားလေးတစ်ခွန်းကဘဲအဓိပ္ပါယ်တွေအမျိုးမျိုးဖြစ်လာရပြန်တာပေါ့..။ဒါကလည်းဖြစ်တတ်တဲ့သဘာဝလေးတွေပါ…..။ဒီလိုဖြစ်တတ်တဲ့သဘာဝလေးတွေကိုသိနေဖို့လိုသလို ကျင့်သုံးဖို့လည်း လိုပြန်တယ်။လောကကြီးမှာ လူအမျိုးမျိုးရှိသလိုစိတ်ကလည်းအထွေထွေရှိပါတယ်…။လူတစ်ယောက်ဆီမှာတောင်မှဘဲ စိတ်အမျိုးမျိုးဖြစ်နေတတ်ပါတယ်…။ စိတ်အခြေအနေတွေ အမျိုးမျိုးရှိနေတာ၊ဖြစ်ပေါ်ခံစားနေတာတွေဟာ လူတိုင်းသိပြီးသားအကြောင်းလေးတွေပါ။တစ်ခါတစ်ရံမှာသိသိချည်းနဲ့ကိုမဆင်ခြင်မိကြပါဘူး။စိတ်အခြေအနေအမျိုးမျိုးရှိတဲ့လူတွေကြားမှာနေထိုင်နေသရွေ့တော့ဒီနှုတ်ခမ်းလေးကနေဖြစ်ပေါ်လာမယ့်၊ပြောဆိုလာမယ့်စကားလုံးလေးတွေကလည်း အားလုံးနဲ့ဆီလျော်တဲ့၊ နားဝင်ခံသာတဲ့စကားလုံးလေးတွေဖြစ်ဖို့လိုလာပြန်ပါတယ်…။လူတစ်ယောက်နဲ့တစ်ယောက် ရင်းနှီးသည်ဖြစ်စေ၊မရင်းနှီးသည်ဖြစ်စေ ပြောဆိုတဲ့စကားလေးတွေဟာတစ်ဖက်သားနားခံသာတဲ့စကားလေးတွေဘဲဖြစ်သင့်ပါတယ်။ငယ်ငယ်ကကျောင်းမှာဆိုခဲ့၊သင်ခဲ့ရတဲ့ကဗျာလေးတစ်ပုဒ်ရှိပါတယ်။
“တစ်ယောက်စကား၊တစ်ယောက်နားမှာ၊
မခါးရအောင် သတိဆောင်၍၊မောင်တို့ဆိုစေ၊
ပျားသကာသို့ ချိုလှစေ။”
အရမ်းအဓိပ္ပါယ်ပြည့်ဝတဲ့ ကဗျာလေးပါ။
လူအမျိုးမျိုး စိတ်အထွေထွေရှိနေတဲ့ လောကကြီးထဲမှာ ကိုယ့်ရဲ့နှုတ်ခမ်းလေးတစ်စုံကြောင့်တစ်ပါးသူအတွက် ချစ်စကိုရှည်စေသော၊ကြည်နူးမှုကိုရစေသော၊ပျော်ရွှင်မှုကိုဖြစ်စေသောစကားလုံးလေးတွေဖြစ်လာသင့်ပါတယ်။သိမ်မွေ့နူးညံ့သောစကားလုံးလေးတွေပြောဆိုသင့်ပါတယ်။ဒီလိုစကားလေးတွေထွက်ဆိုသုံးနှုန်းတဲ့အတွက်ကိုယ်ရဲ့နှုတ်ခမ်းလေးတစ်စုံကြောင့်မင်္ဂလာရှိစေတဲ့အကြောင်းအရာလေးတွေဖြစ်ပေါ်လာစေမယ်လို့ထင်မိပါတယ်။ဒါကြောင့်မုန်းစကိုဖြစ်စေမယ့်၊ကြမ်းတမ်းတဲ့စကားလုံးလေးတွေထွက်စေမယ့် နှုတ်ခမ်းလေးတွေမဖြစ်ဖို့လိုပါတယ်။ဒါကြောင့်လူတိုင်းလူတိုင်းမှာချစ်ဖွယ်သောစကားလေးတွေဆိုတတ်သော၊သိမ်မွေ့နူးညံ့သောစကားလေးတွေသာဖြစ်ပေါ်လာစေသောနှုတ်ခမ်းလေးတွေပိုင်ဆိုင်ကြစေချင်ပါတယ်။

Sunday 20 June 2010

ကျေးဇူးကြီးပေ၊ တို့ဖေဖေ

ကလေးဘ၀ ငယ်စဉ်မှ၊

ဆုံးမသွန်သင် အမြဲပင်။

ကျောင်းနေချိန်တန် ရောက်ခဲ့ပြန်

ပညာယူရန် ဆုံးမပြန်။

ကျောင်းတက်နေစဉ် ချိန်များတွင်၊

ပညာပြည့်ဝ နှလုံးလှကာ

လူကောင်းလူမွန်၊ဖြစ်လာစေရန်

သွန်သင်ဆုံးမပေးသော ဖေဖေ။

ပညာစုံလာ ချိန်ခါမှာ

လောကအလယ် တင့်တယ်စေဖို့

သွန်သင်ဆုံးမပေးသော ဖေဖေ။

ဘ၀တစ်လျှောက်အေးချမ်းစေရန်၊

မြဲရည်သန်လျှက်

သွန်သင်ဆုံးမပေးသော ဖေဖေ။

သမီးနဲ့သား ဇနီးမယားကို

လောကအလယ် တင့်တယ်စေ၊

ရှာဖွေကျွေးပေ တို့ဖေဖေ။

ဖေဖေ့မေတ္တာ၊ကျေးဇူးတရားကား

ကြီးမားလွန်းနေ ရေးဖွဲ့မကုန်နိုင်ပေ။

(အားလုံးသောအဖေများကို ဂုဏ်ပြုသောအားဖြင့် အဖေများနေ့အမှတ်တရ)

Saturday 19 June 2010

သံယောဇဉ်

သံယောဇဉ် တဲ့……။ စကားလေးကသုံးလုံးထဲနော်…..။ဒါပေမယ့်ဒီစာလုံးလေးတွေရဲ့နောက်ကွယ်မှာတော့ခံစားတဲ့သူတွေမှာမူတည်ပြီး လေးနက်မှုတွေ၊အဓိပ္ပါယ်တွေ အမျိုးမျိုးဖြစ်လာတယ်။မိဘနဲ့သားသမီး သံယောဇဉ်၊ မောင်နှမ သံယောဇဉ်၊ သူငယ်ချင်းသံယောဇဉ်၊ဆရာတပည့် သံယောဇဉ်၊ဆွေမျိုး သံယောဇဉ် စသဖြင့်ပေါ့လေ….။

သံယောဇဉ်ပုံစံတွေတူပေမယ့်လည်းလေးနက်မှုကမတူညီကြပြန်ဘူး…။ဒီသံယောဇဉ်တွေအပေါ်မူတည်ပြီးခံစားချက်တွေဖြစ်ပေါ်လာကြပြန်တယ်။ဝမ်းသာမှု၊၀မ်းနည်းမှု၊လွမ်းဆွေးမှုတွေ၊ပျော်ရွှင်ကြည်နူးမှုလေးတွေပေါ့။လေးနက်မှု အပေါ်မူတည်ပြီး ခံစားချက်အတိမ်အနက်တွေ ကွာခြားကုန်ပြန်ရော…။

သြော်…..လူတွေရဲ့စိတ်ခံစားမှုအမျိုးမျိုးကိုဖြစ်စေတဲ့အရာလေးကတော့ဒီသံယောဇဉ်လေးပါပဲ………….။ သံယောဇဉ် ဆိုတာလေးသာမရှိခဲ့ရင် လူတွေလည်း ခံစားချက်မဲ့ကုန်မလားမသိဘူးနော်…။ခံစားချက်မရှိရင် လူ့ဘ၀ကြီးကရော အဓိပ္ပါယ်ရှိပါဦးမလားနော်……..။

Tuesday 1 June 2010

ကြားယောင်နေတယ်…..

ဒီနေ့ ဇွန်လ(၁)ရက်……….။

ကျောင်းတွေစပြီးဖွင့်တဲ့နေ့ပေါ့………။

ငယ်ငယ်ကဆိုခဲ့တဲ့ ကဗျာလေးတစ်ပုဒ်ကိုသတိရနေမိပါတယ်။

“ကျောင်းတက်ခေါင်းလောင်းထိုးပြီ၊တို့များ အတန်းဆီ။

ကျောင်းတက်ခေါင်းလောင်းထိုးပြီ၊တို့များ အတန်းဆီ။

ညီညီညာညာ စည်းကမ်းရှိပါမည်။

ညီညီညာညာ စည်းကမ်းရှိပါမည်။

အမိန့်သံကို နာခံ၊အလံအလေးပြုရမည်။

မျိုးချစ်စိတ်ကိုမွေးမည်၊တို့တစ်တွေ အလေးပြုရမည်။

အတန်းထဲကိုရောက်ရင် ညီစွာမတ်တပ်ရပ်ကာ၊

မင်္ဂလာပါဆရာ၊မင်္ဂလာပါဆရာ

နှုတ်ခွန်းဆက်သရပါမည်။

နှုတ်ခွန်းဆက်သရပါမည်။

မင်္ဂလာပါဆရာ….။၊”

ဒီကဗျာလေးကိုပြန်လည်အမှတ်ရရင်း နားထဲမှာလည်း မင်္ဂလာပါဆရာမ…..ဆိုတဲ့နှုတ်ခွန်းဆက်သံလေးတွေကို ကြားယောင်နေမိပါတော့တယ်။