Tuesday 15 February 2011

ဆေးရောင်လှလှ ခြယ်ကြစို့...။

ဘ၀ဆိုတာ ကိုယ်တိုင်ရေးတဲ့ စာအုပ်တစ်အုပ်နဲ့ တူတယ်လို့ ပြောတာကြားဖူး၊ ဖတ်ဖူးပါတယ်။ ကိုယ့်ရဲ့ စာမျက်နှာတွေကို ကိုယ်တိုင်ဘဲ သရုပ်ဖော် ရေးသားနေကြရပါတယ်..။ ကိုယ်ရေးသား ခြယ်မှုန်းတဲ့ အပေါ်မှာ မူတည်ပြီးတော့ ကိုယ်ရဲ့ ဘ၀ စာမျက်နှာ လှပမှု၊ မလှပမှုလေးတွေ ဖြစ်ပေါ်လာတာပါ။

ပန်းချီကား တစ်ချပ်ကို ရေးဆွဲနေတာနဲ့လည်းတူပါတယ်..။ ပန်းချီဆွဲသူတိုင်းက ကိုယ့်ရဲ့ ပန်းချီကားလေးကို အလှပဆုံး၊ စွဲဆောင်မှုအရှိဆုံးနဲ့ အဓိပ္ပါယ်တွေ အလေးအနက်ပါဝင်နေအောင် ရေးဆွဲတတ်ကြပါတယ်..။ အဲဒီလို စိတ်ရော၊ ကိုယ်ပါ နှစ်ပြီး ရေးဆွဲထားတဲ့ ပန်းချီကားကို ပန်းချီပညာရဲ့တန်ဖိုးကို နားလည်သူတိုင်း နှစ်သက် လက်ခံကြပါတယ်..။ အဲဒီလို ကောင်းမွန် ပြည့်စုံတဲ့ ပန်းချီကား တစ်ချပ် ရရှိဖို့ဆိုတာကလည်း လွယ်ကူတဲ့ အလုပ် တစ်ခုတော့ မဟုတ်ပါဘူး။ မိမိရဲ့ ကိုယ်စွမ်း၊ ဥာဏ်စွမ်းကို အစွမ်းကုန်သုံးပြီး အကောင်းဆုံးဖြစ်အောင် ကြိုးစားကြရတာပါ။ အဲဒီလို ကြိုးပမ်းနေရင်းနဲ့ တစ်ခုခု လွဲမှား သွားရင်ဘဲ ဖြစ်ဖြစ်၊ စိတ် အာရုံ မ၀င်စားတော့ရင်ဘဲ ဖြစ်ဖြစ် ပန်းချီကားက မလှပနိုင်တော့ သလို တန်ဖိုးလည်းမရှိတော့ပါဘူး။ ဘ၀ကိုလည်း အကောင်းဆုံး ပန်းချီကား တစ်ချပ်လို ကောင်းမွန် လှပလာအောင် ရေးဆွဲနိုင်ကြရင် အကောင်းဆုံးပါ..။ ပန်းချီဆရာရဲ့ စုတ်ချက်တိုင်းက ပန်းချီကားကောင်း တစ်ချပ် ဖြစ်လာဖို့ အရေးကြီးသလို လူတွေရဲ့ လုပ်ဆောင်ချက်တွေတိုင်းကလည်း မိမိတို့ရဲ့ ဘ၀ လှပဖို့ အတွက် အရေးကြီးပါတယ်..။ ပန်းချီဆရာရဲ့ စုတ်ချက်မှားသွားလို့ ပန်းချီကားကောင်းတစ်ချပ်ဖြစ်မလာခဲ့ရင် အသစ်ပြန်စပြီးစွဲလို့ရပေမယ့် ဘ၀ကတော့ လုပ်ဆောင်ချက်တစ်ခု လွဲသွားရင် အသစ်ကပြန်စလို့ ရနိုင်ဖို့ မလွယ်ကူသလို ရင်းနှီးထားတဲ့ အချိန်တွေကလည်း ပြန်မရနိုင်တော့ပါဘူး။ ဒါက ပြန်စလို့ ရနိုင်တဲ့ အရာတွေ အတွက်ပေါ့။ ဘယ်လိုမှ ပြန်အစားထိုးလို့မရနိုင်တဲ့ အရာတွေအတွက် လုပ်ဆောင်ချက်တွေ မမှားယွင်းဘဲ ကောင်းမွန်နေဖို့ မှန်ကန်တဲ့ ဆုံးဖြတ်ချက် လိုအပ်ပါတယ်။ လှပတဲ့ ဆေးရောင်စုံ ပန်းချီကားတစ်ချပ် ရရှိဖို့ ဆေးရောင်များစွာနဲ့ ခြယ်မှုန်းရသလို မိမိတို့ရဲ့ ဘ၀ လှပဖို့လည်း ဆေးရောင်တွေနဲ့တူတဲ့ စိတ်ဓါတ်တွေ၊ အသိပညာတွေ၊ ခွန်အားတွေနဲ့ အပေါင်းအသင်း၊ ပတ်ဝန်းကျင်တွေ ပေါင်းစပ်ပြီး ခြယ်မှုန်းကြရပါမယ်။ ဘ၀ဖန်တီး ပုံဖော်တဲ့အခါမှာလည်း အသိဥာဏ်ပညာလည်း လိုအပ်သလို စိတ်ဓါတ်ကောင်းမွန်ဖို့လည်း အရေးကြီးပါတယ်။ မိတ်ဆွေ အပေါင်းအသင်းဆိုတာကလည်း မရှိမဖြစ်ပါဘဲ။ ဆေးရောင်စုံ ပန်းချီကား တစ်ချပ်မှာ ဆေးရောင် တစ်ရောင်တည်းကြောင့် ပန်းချီကား လှသွားတယ်လို့မရှိပါဘူး။ ဆေးရောင်လေးတွေကို အချိုးညီညီ ပေါင်းစပ်လိုက်မှသာ လှပကောင်းမွန်တဲ့ ပန်းချီကားတစ်ချပ်ရတာပါ။ ဘ၀ကိုလည်း လှပတဲ့ဆေးရောင်စုံ ပန်းချီကားတစ်ချပ်လို လှပလာအောင် ဆေးရောင်စုံလေးတွေနဲ့ အချိုးညီညီ ပေါင်းစပ်ပြီး လှပတဲ့ ပန်းချီကား တစ်ချပ်ဖြစ်အောင် ဖန်တီးကြစို့လား။